Pages

Tuesday, August 28, 2012


 

 
 
 ළතෙත් බලයෙන් කිරට හැරවූ රුධිර බිඳු නාමෙන්
නුඹේ හීනය නුබේ දෝතේ තබමි අභිමානෙන්
ගෙවූ වස් දුක් නොදී පිරියම් කල සෙනෙහෙ දානෙන්
මව්නි ණයගැති වෙම් සදා ජීවිතේ අනුප්‍රාණෙන්..
 
 
අඳුර ආ දා මැකුණු නෙක සෙවනැල් රටා අතරේ
නොනිම් දැල්වුණු එකම පහනකි රැඳුනු නෙත් මානේ
වදන් නැහැ සමකරනු වස් නුඹෙ මහමෙරක් සෙනෙහේ
පියාණෙනි මම දනිම් ඔය හද මට තියෙන උරුමේ..


 කලා සොලොසක් පුරා පුරසඳ පෑයූ අහසක් මෙන්
වලා පලවා මගේ අහසට එළිය දුන් නාමෙන්
එලා පාවඩ නමදිමී යුග දෙපා බහුමානෙන්
මව්නි පියාණෙනි ආයු බෝ ලැබ හිඳිනු මැන නිදුකින්!
 

 
 

Tuesday, May 1, 2012

~පාපොච්චාරණය~

කාෂ්ටක ඉඩෝරයට වට
සිහින් වැහි පොදක් ලෙසට
ආවේ අයිලයට
නොදැනයි නුඹ සිටින බව..

ඉතින් මා අල්තීනායි,
කෙසේ පවසම්ද පෙම..
නුඹ පුoචි කුමරියකි
සිප් අකුරු සනසලන..
මම ගුරුතුමා වීමි
ජීවිත පොත පෙරලන..

දනිමි සිත නොදෙන බව කිසි දිනක මට කමා
දුන්නත් පුoචි නුඹ ඔව් මo ඒ ගුරුතුමා..
අතෑරියේ නගරයට ගන්නටයි දිවි උපමා
ඒත් ඒ දවසට තවම ලොබ කරමි මා..

ආදරෙයි කුමරියේ නෑ මා එය පැවසුවේ
දයාබර නුඹෙ දෙනෙත් නෑ යළි නෙත ගැටුනේ..
පමා වැඩි නමුදු මා, නුඹ ලොව ජයගත්තේ
මහා ඇදුරුතුමියනි අවසරයි සමුගන්නේ!



Thursday, April 26, 2012

~ මතක සිත් පිළිරූ ~
 
 
නුඹ නමින් ඇඳුණූ
හදවත කොනක රැඳුණූ
මතක සිත් පිළිරූ
වැජඹෙති ලෙසින් රුසිරූ..

දරාගනු බැරිව ඉහිලූ
දුකකි නෙත නිති ඉහිරූ
නොදත් සේ හද කඩොලු
නොනිම් දළුලන පිළිරූ..

සිතුම් සටනින් ඇවිලූ
පිහි තුඩකි ජය කැන්දූ
බිම ලමින් මතක පිළිරූ
හද කොනින් ගලයි රුහිරූ...


Monday, April 23, 2012


~ බත් අම්මා ~

 
කහට දත් පෙල රතට
හරව හරවා කන 'විට'..
මේරූ හිසකේය
ගොතා ඇති නිසි පිට අග..
උස් සිනහ නැති මුවඟ
මුදු බැලුම් ඇති වෑහෙන..
බත් අම්මා අපේ
තරම කුසගිනි අඳුනන..

දහසින් අගනේය ඈ
අහසින් වැටෙන රිවිරැස..
රහසින් හඬනේය ඈ
හඬනා වලාකුළු යට..
මහමෙර බරැති ඈ හිස
පුතු සෙවණ නැත..
දිවි පැල ඇගේ වැනි
සඳු නැති අහස්ගඟ

ඉදවෙන බතින් බත
දින පසු පසින් යත..
ඇය හා හතර අත
යන පා ගෙවී ඇත..
සසර එතෙර නොපතමි
දුක් සයුරු මැද..
මතු පින් රැගෙන ඉපදෙනු
කුල ගෙයක සැප..!